പുറംകാഴ്ചകള്‍

നാം അറിയാത്ത..., അല്ല..., നാം അറിഞ്ഞിട്ടും,

അറിഞ്ഞില്ലെന്നു നടിക്കുന്ന  ചില ജീവിതങ്ങളുണ്ട്...

നാം കണ്ടിട്ടും,  കാണാത്ത ജീവിതങ്ങള്‍.... 

ആ ജീവിതങ്ങളുടെ പുറംകാഴ്ചകളിലേക്കു...

പുറംകാഴ്ചകള്‍ 

പകലുറങ്ങി, ഈ രാവുമുറങ്ങി

രാവിന്‍ നിശബ്ദശബ്ദങ്ങളുമുറങ്ങി  

റാന്തലിന്‍ വെളിച്ചം കടത്തിണ്ണയില്‍ നിറഞ്ഞു 

കാറ്റാടിക്കോലങ്ങള്‍ വട്ടമിട്ടിരുന്നു 

ചില്ലറത്തുട്ടുകള്‍ വാരി വിതറി 

എണ്ണമില്ലാത്തവര്‍ എണ്ണിത്തുടങ്ങി... 

സ്വപ്നങ്ങള്‍ കാണാന്‍ വിലക്കുള്ളവര്‍

സ്വപ്നങ്ങളെന്തെന്നറിയാത്തവര്‍..

പല്ലുന്തിയ മോണകള്‍ ഇളക്കിച്ചിരിച്ചു 

ദിനാന്ത്യ "സൗഭാഗ്യം" നോക്കി രസിച്ചു

തങ്ങളില്‍ത്തങ്ങളില്‍ തോളത്തു തട്ടിയും 

ഇല്ലാ ദൈവങ്ങളെ പരിഹസിച്ചും 

തന്നുടെ നേട്ടങ്ങളൊതുക്കിവച്ചു 

ഈ രാവു വെളുപ്പിക്കാന്‍ കിടന്നുറങ്ങി..

കാലമുറങ്ങും ഈ കോലവുമുറങ്ങും

പാടാന്‍ മറന്നയീകഥകളുമുറങ്ങും  

കീറിയ കുപ്പായം കൂട്ടിപ്പിടിച്ചും 

തെരുവു സംഗീതത്തിനു ചുവടു വെച്ചും 

പലതുള്ളിക്കണ്ണീരായി 

വരുമെനിയും ജന്മങ്ങള്‍ 

മുജ്ജന്മ പാപത്തിന്‍ 

കണക്കു തീര്‍ക്കാത്തവര്‍